இந்தியா அசத்தல் சாதனை : 5 நாட்களில் ரூ.20 லட்சம் கோடி முதலீடு!

ஐந்து நாட்கள் நடந்த உலக பொருளாதார மன்ற ஆண்டு கூட்டத்திலிருந்து, இந்தியா 20 லட்சம் கோடி ரூபாய்க்கும் அதிகமான முதலீட்டு உறுதிமொழிகளை உள்நாட்டிற்கு கொண்டு வந்துள்ளது. அது பற்றிய ஒரு செய்தி தொகுப்பு.

உலகப் பொருளாதார மன்றத்தின் ஆண்டுக் கூட்டம் கடந்த 20 ஆம் தேதி தொடங்கி 5 நாட்கள் நடைபெற்றது. சுவிட்சர்லாந்தில் உள்ள டாவோஸ் நகரில் நடைபெற்ற இந்த கூட்டத்தில், இதுவரை இல்லாத வகையில் மிகப்பெரிய குழுவை இந்தியா அனுப்பியிருந்தது.

மத்திய அமைச்சர் அஸ்வினி வைஷ்ணவ் தலைமையில், ஐந்து மத்திய அமைச்சர்கள், மூன்று மாநில முதலமைச்சர்கள் மற்றும் பல மாநில அமைச்சர்கள் உள்ளிட்ட இந்தியக் குழு இக்கூட்டத்தில் கலந்து கொண்டது.

மேலும்,சமூகம் மற்றும் கலைத்துறையைச் சேர்ந்த ஏறக்குறைய 100 CEO க்கள் மற்றும் பல்வேறு துறைகளைச் சேர்ந்த வல்லுனர்களும் கலந்து கொண்டனர்.

உலக பொருளாதார மன்றத்தின் ஆண்டுக் கூட்டத்தில் இருந்து, 20 லட்சம் கோடி ரூபாய்க்கும் அதிகமான முதலீடுகளை இந்தியா கொண்டு வந்துள்ளது. பசுமை எரிசக்தி, அதிநவீன தொழில்நுட்ப மேம்பாடு மற்றும் தரவு மையங்கள் ஆகியவற்றில் முதலீடுகளை ஈர்க்க கவனம் செலுத்தப்பட்டதாக கூறப் படுகிறது.

மகாராஷ்டிரா மாநில முதல்வர் தேவேந்திர ஃபட்னாவிஸ் தலைமையிலான பிரதிநிதிகள் குழு, மொத்த முதலீடுகளில் 80 சதவீதத்தை கவர்ந்துள்ளது.

15.70 லட்சம் கோடி ரூபாய் மதிப்புள்ள 61 புரிந்துணர்வு ஒப்பந்தங்களில் (MoU) மகாராஷ்டிரா மாநில அரசு கையெழுத்திட்டுள்ளது. இந்த ஒப்பந்தங்களில் மூலம் 16 லட்சம் வேலைவாய்ப்புகள் உருவாகும் என்று மதிப்பிடப் பட்டுள்ளது.

தெலங்கானா மாநில முதல்வர் ரேவந்த் ரெட்டி தலைமையிலான பிரதிநிதிகள் குழு, 1.79 லட்சம் கோடி ரூபாய் மதிப்புள்ள 20 புரிந்துணர்வு ஒப்பந்தங்களில் கையெழுத்திட்டுள்ளது. இதன் மூலம் கிட்டத்தட்ட 50,000 வேலைவாய்ப்புகள் உருவாகும் என்று எதிர்பார்க்கப்படுகிறது.

1 டிரில்லியன் அமெரிக்க டாலர் பொருளாதாரமாக மாறுவதற்கான திட்டத்துடன் உள்ள உத்தரபிரதேசம் அரசும் தொலைநோக்குப் பார்வையுடன் முக்கிய முதலீடுகளையும் பெற்றுள்ளது.

மத்திய அமைச்சர் சிராக் பாஸ்வான், உலகளாவிய குளிர்பான நிறுவனமான AB InBev, இந்தியாவின் beverage துறையில், பல்வேறு மாநிலங்களில் சுமார் 250 மில்லியன் அமெரிக்க டாலர்களை முதலீடு செய்யும் என்று அறிவித்துள்ளார்.

இதற்கிடையில், தெலுங்கானாவில் இரண்டு புதிய உற்பத்தி ஆலைகளை அமைக்கும் திட்டங்களை இந்துஸ்தான் யூனிலீவர் நிறுவனம் தெரிவித்துள்ளது.

கூடுதலாக, ஏராளமான பிற உலகளாவிய நிறுவனங்கள் இந்திய நிறுவனங்களுடன் சாத்தியமான ஒப்பந்தங்களை ஏற்படுத்த ஆய்வுகள் செய்துள்ளன.

இந்தியாவின் அனைத்து மாநிலங்கள் மற்றும் மத்திய அரசுத் துறைகளும் இடத்தைப் பகிர்ந்து கொள்ளும் வகையில், உலகப் பொருளாதார மன்றத்தின் ஆண்டுக் கூட்டத்தில் பிரத்யேக இரண்டு அரங்குகள் அமைக்கப் பட்டிருந்தன.

மத்திய அமைச்சர் அஸ்வினி வைஷ்ணவ் வழிநடத்திய "டீம் இந்தியா", தங்கள் திறனை சர்வதேச நிறுவனங்களுக்கு வெளிப்படுத்தியது.

முதல் முறையாக, பல்வேறு அரசியல் கட்சிகளைச் சேர்ந்த மாநில மற்றும் மத்திய அமைச்சர்களைக் கொண்ட ஒரு கூட்டு செய்தியாளர் சந்திப்பும் நடைபெற்றுள்ளது.

உலகளாவிய புவிசார் அரசியல் மற்றும் புவிசார் பொருளாதார சூழ்நிலையில் மிக முக்கியமான கட்டத்தில் இருப்பதாகவும், இந்தியா அறிவுசார் சொத்துரிமைகளை மதிக்கும் நம்பகமான மற்றும் ஜனநாயகம் மிக்க நாடாகவும் உருவெடுத்துள்ளது என்று மத்திய அமைச்சர் அஸ்வினி வைஷ்ணவ் தெரிவித்துள்ளார்.

அமைதி, வளர்ச்சி மற்றும் அனைவரையும் உள்ளடக்கிய வளர்ச்சிக்கான இந்தியாவின் உறுதியை உலகத்துக்கு எடுத்துக் காட்டியுள்ளதாக மத்திய அமைச்சர் அஸ்வினி வைஷ்ணவ் தெரிவித்துள்ளார்.