ஈரான் மீது இஸ்ரேல் போர் விமானங்கள் தாக்குதல் - 20 ராணுவ தளங்கள் தரைமட்டம்!

ஈரானின் பல்வேறு பகுதிகளை குறிவைத்து இஸ்ரேல் போர் விமானங்கள் தாக்குதல் நடத்தியதில் 20 ராணுவ தளங்கள் தரைமட்டமாகின.

கடந்த ஒன்றாம் தேதி இஸ்ரேல் பகுதிகளை குறிவைத்து ஈரான் ராணுவம் 200 ஏவுகணைகளை வீசி தாக்குதல் நடத்தியது. இந்த சூழலில், ஈரானின் பல்வேறு பகுதிகளை குறிவைத்து இஸ்ரேல் விமானப்படையின் 100 போர் விமானங்கள் தாக்குதல் நடத்தின. முதலில், ஈரான் எல்லை பகுதிகளில் நிறுவப்பட்டிருந்த ரேடார் சாதனங்களை இஸ்ரேல் விமானங்கள் குண்டுகளை வீசி அழித்தன.

மேலும், ட்ரோன் உற்பத்தி ஆலைகள், ஆயுத கிடங்குகள், ராணுவ தளங்கள் மீது இஸ்ரேல் போர் விமானங்கள் அடுத்தடுத்து தாக்குதல் நடத்தின. இதில் ஈரான் ராணுவ தளங்கள் தரை மட்டமாகின. குறிப்பாக, ஈரானின் நட்பு நாடான சிரியாவின் ரேடார் அமைப்புகளும் குண்டுவீசி அழிக்கப்பட்டன. சுமார் 3 மணி நேரம் இந்த தாக்குதல் நடத்தப்பட்டதாக கூறப்படுகிறது.