கனமழை பெய்ய வாய்ப்பு! : ஆட்சியர்களுக்கு தமிழக அரசு கடிதம்!

தமிழகத்திற்கு கனமழை எச்சரிக்கை விடுக்கப்பட்டதை தொடர்ந்து, முன்னெச்சரிக்கை நடவடிக்கைகளை தீவிரப்படுத்துமாறு மாவட்ட ஆட்சியர்களுக்கு தமிழக அரசு கடிதம் எழுதியுள்ளது.

Advertisement

வங்கக் கடலில் காற்றழுத்த தாழ்வு பகுதி உருவாகியிருக்கும் நிலையில் வரும் 17 ஆம் தேதி வரை தமிழகத்தின் பல்வேறு மாவட்டங்களில் கனமழை பெய்யும் என வானிலை ஆய்வு மையம் எச்சரிக்கை விடுத்துள்ளது.

கனமழையில் இருந்து பொதுமக்களை பாதுகாக்கும் வகையில் பேரிடர்களை கையாள்வதற்கான விரிவான வழிகாட்டு நெறிமுறைகள் அனைத்தையும் முன்கூட்டியே பின்பற்றக் கோரி மாவட்ட ஆட்சியர்களுக்கு தமிழக அரசின் வருவாய் நிர்வாக ஆணையர் ராஜேஷ் லக்கானி கடிதம் எழுதியுள்ளார்.

குறிப்பாக கனமழையால் பாதிக்கப்படும் பொதுமக்கள் தங்குவதற்கான நிவாரண முகாம்கள், உணவு, குடிநீர் உள்ளிட்ட அடிப்படை வசதிகளை முறையாக ஏற்படுத்தி தர வேண்டும் எனவும், அந்தந்த மாவட்ட நிர்வாகத்தின் அனைத்து துறைகளும் ஒருங்கிணைந்து செயல்பட வேண்டும் எனவும் அந்த கடிதத்தில் குறிப்பிடப்பட்டுள்ளது.