கிராண்ட் மாஸ்டர்ஸ் செஸ்! : அரவிந்த் சிதம்பரம் சாம்பியன் பட்டம் வென்று சாதனை!

சென்னை கிராண்ட் மாஸ்டர்ஸ் செஸ் தொடரின் மாஸ்டர்ஸ் பிரிவில் வெற்றி பெற்ற அரவிந்த் சிதம்பரத்திற்கு பரிசு தொகையாக 15 லட்சம் ரூபாய் வழங்கப்பட்டது.

தமிழ்நாடு விளையாட்டு மேம்பாட்டு ஆணையம் சார்பில் கோட்டூர்புரம் அண்ணா நூற்றாண்டு நூலகத்தில் சென்னை கிராண்ட் மாஸ்டர்ஸ் கிளாசிக் செஸ் தொடர் நடைபெற்றது. மாஸ்டர்ஸ் மற்றும் சேலஞ்சர்ஸ் என இரு பிரிவுகளாக இந்த செஸ் போட்டிகள் நடைபெற்ற நிலையில், இரு பிரிவுகளிலும் தமிழக வீரர்கள் சாம்பியன் பட்டம் வென்றனர்.

வேளச்சேரியில் உள்ள தனியார் விடுதியில் இதற்கான பரிசுகள் வழங்கும் நிகழ்ச்சி நடைபெற்றது. இதில் செஸ் சாம்பியன் விஸ்வநாதன் ஆனந்த், துணை முதலமைச்சர் உதயநிதி ஸ்டாலின் உள்ளிட்டோர் கலந்துகொண்டு வெற்றிபெற்றவர்களுக்கு பரிசுகளை வழங்கினர்.

மேலும், இத்தன் மாஸ்டர்ஸ் பிரிவில் சாம்பியன் பட்டம் வென்ற அரவிந்த் சிதம்பரத்திற்கு 15 லட்சம் ரூபாய்க்கான காசோலையும், சேலஞ்சர்ஸ் பிரிவில் சாம்பியன் பட்டம் வென்ற பிரணவ்க்கு 6 லட்சம் ரூபாய்க்கான காசோலையும் வழங்கப்பட்டது.