சட்டவிரோத பணபரிமாற்ற தடை சட்ட வழக்கு - ஜாபர் சாதிக் ஜாமின் மனு தள்ளுபடி!

சட்டவிரோத பணபரிமாற்ற தடைசட்ட வழக்கில் கைது செய்யப்பட்டுள்ள ஜாபர் சாதிக், அவரது சகோதரர் ஆகியோரின் ஜாமின் மனுக்களை தள்ளுபடி செய்து சென்னை சிபிஐ சிறப்பு நீதிமன்றம் உத்தரவிட்டுள்ளது.

Advertisement

போதைப் பொருள் கடத்தல் வழக்கில் கைது செய்யப்பட்ட திரைப்பட தயாரிப்பாளர் ஜாபர் சாதிக், சட்டவிரோத பணப்பரிமாற்றத்தில் ஈடுபட்டதாகக் கூறி அவரை கடந்த ஜூன் 26-ம் தேதி அமலாக்கத்துறை கைது செய்தது.

இதனை தொடர்ந்து ஜாபர் சாதிக்கின் சகோதரர் முகமது சலீமை கைது செய்த அமலாக்கத்துறை, இந்த வழக்கு தொடர்பாக 302 பக்கங்கள் கொண்ட குற்றப்பத்திரிகையை தாக்கல் செய்தது.

இந்த வழக்கில் ஜாமின் வழங்க கோரி ஜாபர் சாதிக் மற்றும் அவரது சகோதரர் முகமது சலீம் ஆகியோர் சென்னை சிபிஐ சிறப்பு நீதிமன்றத்தில் மனு தாக்கல் செய்தனர்.

இந்த மனுக்கள் நீதிபதி எழில் வேலவன் முன்னிலையில் விசாரணைக்கு வந்தபோது, இருவருக்கு ஜாமின் வழங்க அமலாக்கத்துறை தரப்பில் எதிர்ப்பு தெரிவிக்கப்பட்டது.
சட்டவிரோத பண பரிமாற்றம் எதுவும் செய்யவில்லை என மனுதாரர்கள் தரப்பில் வாதிடப்பட்டது.

இருதரப்பு வாதங்களை கேட்டறிந்த நீதிபதி எழில் வேலவன், தற்போதைய நிலையில் ஜாபர் சாதிக், அவரது சகோதரருக்கு ஜாமின் வழங்க முடியாது என தெரிவித்தார். இருவரின் ஜாமின் மனுக்களையும் தள்ளுபடி செய்து நீதிபதி உத்தரவிட்டார்.