டெல்லி கணேஷ் உடலுக்கு விமானப்படை சார்பில் அஞ்சலி - நெசப்பாக்கம் மின் மயானத்தில் தகனம்!

 நடிகர் டெல்லி கணேஷின், திரையுலகினர், அரசியல் கட்சி தலைவர்களின் அஞ்சலிக்கு பிறகு தகனம் செய்யப்பட்டது.

உடல் நலக்குறைவால் அவதிப்பட்டு வந்த பிரபல நடிகர் டெல்லி கணேஷ் நேற்று காலமானார். சென்னை ராமாபுரத்தில் உள்ள அவரது வீட்டில் வைக்கப்பட்டிருந்த உடலுக்கு திரை பிரபலங்கள், அரசியல் கட்சி தலைவர்கள், பொதுமக்கள் உள்ளிட்ட பலர் அஞ்சலி செலுத்தினர்.

நடிப்பதற்கு முன்பு 10 ஆண்டுகள் டெல்லி கணேஷ் விமான படையில் பணிபுரிந்துள்ளார். அதனால், அவரது உடலுக்கு இந்திய விமான படை சார்பில் மரியாதை செலுத்தப்பட்டது. அவரது இல்லத்திற்கு நேரில் சென்ற விமான படை வீரர்கள், டெல்லி கணேஷ் உடல் மீது தேசியக்கொடி போர்த்தியும், மலர் வளையம் வைத்தும் மரியாதை செலுத்தினர்.

இதனையடுத்து டெல்லி கணேஷின் உடல், சென்னை ராமாபுரத்தில் உள்ள அவரது இல்லத்தில் இருந்து ஊர்வலமாக எடுத்துச் செல்லப்பட்டு நெசப்பாக்கம் மின் மயானத்தில் தகனம் செய்யப்பட்டது. நண்பர்கள், உறவினர்கள் மற்றும் திரையுலகினர் கண்ணீர் மல்க அவரின் இறுதிப் பயணத்தில் கலந்துகொண்டு அஞ்சலி செலுத்தினர்.