தூத்துக்குடியில் விசைப்படகு உரிமையாளர்கள் காலவரையற்ற வேலை நிறுத்தம்!

இரவு, பகல் என இருவேளையும் மீன் பிடிக்கலாம் என்ற பரிந்துரையை நிறைவேற்றக்கோரி தூத்துக்குடியில் விசைப்படகு உரிமையாளர்கள் மற்றும் தொழிலாளர்கள் காலவரையற்ற வேலைநிறுத்த போராட்டத்தில் ஈடுபட்டுள்ளனர்.

Advertisement

தூத்துக்குடி எல்லைக்குள் கேரள மீனவர்கள் இரவு, பகலாக மீன் பிடித்து வருவதால், தங்களின் வாழ்வாதாரம் பாதிக்கப்பட்டுள்ளதாகவும், தங்களையும் இரவு நேரத்தில் மீன் பிடிக்க அனுமதிக்கக் கோரியும் முன்னாள் மாவட்ட ஆட்சியரிடம் தூத்துக்குடி மீனவர்கள் மனு அளித்தனர்.

அதனடிப்படையில், மீனவர்களுக்காக அமைக்கப்பட்ட குழு, தூத்துக்குடி மீனவர்கள் இரவு, பகல் என இருவேளையும் மீன்பிடிக்கச் செல்லலாம் என பரிந்துரைத்தது. இந்நிலையில், அந்த பரிந்துரையை நிறைவேற்றக்கோரி தூத்துக்குடி விசைப்படகு உரிமையாளர்கள் மற்றும் தொழிலாளர்கள் காலவரையற்ற வேலைநிறுத்தப் போராட்டத்தில் ஈடுபட்டுள்ளனர்.

தூத்துக்குடி எல்லைக்குள் இரவு பகலாக மீன் பிடித்து வரும் கேரள மீனவர்களை உடனடியாக தடுத்து நிறுத்த வேண்டும் என்றும் மீனவ சங்கத்தினர் கோரிக்கை விடுத்துள்ளனர்.

வேலைநிறுத்த போராட்டத்தால் 17 ஆயிரத்திற்கும் மேற்பட்ட தொழிலாளர்கள் வாழ்வாதாரத்தை இழந்துள்ளதாகவும், இந்த விவகாரத்தில் தமிழக அரசு உரிய நடவடிக்கை எடுக்க வேண்டும் எனவும் மீனவர்கள் வலியுறுத்தியுள்ளனர்.