மகாராஷ்டிரா சட்டப்பேரவை தேர்தல் - ஜனநாயக கடமை ஆற்றிய பிரபலங்கள்!

மகாராஷ்டிரா மாநிலம் சட்டமன்ற தேர்தலுக்கான வாக்குப்பதிவி இன்று விறுவிறுப்பாக நடைபெற்று வருகிறது.

மும்பையில், உள்ள வாக்குச்சாவடியில் அம்மாநில ஆளுநர் சிபி ராதாகிருஷ்ணன் தனது வாக்கை செலுத்தி, ஜனநாயக கடமையாற்றினார்.

பாராமதி சட்டசபை தொகுதியில் காலையிலேயே துணை முதல்வர் அஜித் பவார் வாக்களித்தார். பின்னர் செய்தியாளர்களிடம் பேசிய அவர், மகாராஷ்டிரா சட்டசபை தேர்தலில் 8-வது முறையாகவும் வென்று, மக்களுக்கு சேவை செய்வேன் என நம்பிக்கை தெரிவித்தார்.

இதேபோல் சரத்பவார் மகள் சுப்ரியா சுலே, குடும்பத்துடன் வாக்களித்தார். பின்னர், அவரது தந்தையான சரத்பவாரும் தனது வாக்கினை பதிவு செய்தார்.

இதேபோல் பாலிவுட் நட்சத்திரங்களான அக்‌ஷய் குமார், சோனு சூட், ஃபர்ஹான் அக்தர் மற்றும் ஜோயா அக்தர் உள்ளிட்டோர் வரிசையில் காத்திருந்து வாக்களித்தனர். அவர்களை பார்த்த வாக்காளர்கள் சிலர், திரைநட்சத்திரங்களுடன் போட்டோ மற்றும் செல்பி எடுக்க முயன்றனர்.

மும்பையில் உள்ள வாக்குச் சாவடியில் தனது மனைவி மற்றும் மகளுடன் வந்து முன்னாள் கிரிக்கெட் வீரர் சச்சின் டெண்டுல்கர் வாக்களித்தார். அப்போது செய்தியாளர்களிடம் பேசிய அவர், தேர்தல் ஆணையத்தின் தூதுவராக இருந்துள்ளேன் எனவும், வாக்களிக்க வேண்டியது அனைத்து இந்தியக் குடிமகனின் முக்கிய கடமை என்றும் குறிப்பிட்டார்.