மருத்துவர் சுப்பையா கொலை வழக்கு : தமிழக அரசுக்கு உச்சநீதிமன்றம் உத்தரவு!

மருத்துவர் சுப்பையா கொலை வழக்கு தொடர்பான அனைத்து ஆவணங்களையும் உச்சநீதிமன்றத்தில் தாக்கல் செய்ய தமிழக அரசுக்கு உச்சநீதிமன்றம் உத்தரவிட்டுள்ளது.

சொத்து தகராறு விவகாரத்தில் கடந்த 2013ம் ஆண்டு, சென்னை ராஜா அண்ணாமலைபுரத்தில் வைத்து கூலிப்படையினரால் நரம்பியல் மருத்துவர் சுப்பையா கொலை செய்யப்பட்ட வழக்கில் கைது செய்யப்பட்ட 10 பேரில் 9 பேர் குற்றவாளிகள் என சென்னை அமர்வு நீதிமன்றம் தீர்ப்பளித்தது.

தங்களுக்கு விதிக்கப்பட்ட தூக்கு தண்டனை எதிர்த்து குற்றவாளிகள் அனைவரும் சென்னை உயர்நீதிமன்றத்தில் மேல்முறையீடு செய்தனர், இந்த வழக்கை விசாரித்த நீதிபதிகள், தீர்ப்பில் ஒன்பது பேர் மீதான குற்றச்சாட்டுகள் சரிவர நிரூபிக்கப்படவில்லை என கூறி, அவர்களை விடுவிப்பதாக தீர்ப்பளித்தனர்.

அந்த தீர்ப்பை எதிர்த்து தமிழ்நாடு அரசு, மருத்துவர் சுப்பையாவின் மனைவி சாந்தி தரப்பில் உச்சநீதிமன்றத்தில் மேல்முறையீடு செய்யப்பட்டது.

இந்த மேல்முறையீட்டு வழக்கு நீதிபதி பெலா.எம்.திரிவேதி தலைமையிலான அமர்வில் மீண்டும் விசாரணைக்கு வந்தது. அப்போது, வழக்கினை வேறு ஒரு தேதிக்கு வாதம் மற்றும் இறுதி விசாரணைக்காக பட்டியலிட வேண்டும் என்ற தமிழக அரசின் மூத்த வழக்கறிஞர் முகுல் ரோத்தஹியின் கோரிக்கையை ஏற்று, வழக்கு மீதான விசாரணையை 6 வாரத்துக்கு ஒத்திவைத்து உத்தரவிடப்பட்டது.

மேலும், இந்த இடைப்பட்ட காலத்தில் குற்றவாளிகள் பொன்னுசாமி, பேசில் பென்னுசாமி, போரிஸ் பொன்னுசாமி உள்ளிட்ட 9 பேரும் பதில் மனுவை தாக்கல் செய்ய வேண்டும் எனவும், அதேபோல சென்னை உயர்நீதிமன்றத்தில் தாக்கல் செய்த ஆவணங்கள், அனைத்தையும் தமிழக அரசு உச்சநீதிமன்றத்தில் தாக்கல் செய்யவும் நீதிபதிகள் உத்தரவிட்டனர்.