எல்லையில் ராணுவ வீரர்களுடன் தீபாவளியை கொண்டாடிய பிரதமர் மோடி!

கட்ச் பகுதியில் உள்ள இந்திய-பாகிஸ்தான் எல்லையில் ராணுவ வீரர்களுடன் பிரதமர் மோடி தீபாவளியை கொண்டாடினார்.

ஆண்டுதோறும் பாதுகாப்பு படை வீரர்களுடன் தீபாவளி கொண்டாடுவதை பிரதமர் மோடி வழக்கமாக கொண்டுள்ளார். அந்த வகையில் இந்த ஆண்டும் குஜராத்தில் உள்ள கட்ச் பகுதியில் முப்படை வீரர்கள், எல்லை பாதுகாப்பு படையினருடன் பிரதமர் மோடி தீபாவளியை கொண்டாடினார்.

ராணுவ உடையில் அங்கு சென்ற அவர் பாதுகாப்பு படை வீரர்களுக்கு இனிப்புகளை வழங்கி தீபாவளியை கொண்டாடினார்.

இதனைத்தொடர்ந்து பேசிய அவர், தீபாவளி பண்டிகையை ராணுவ வீரர்களுடன் கொண்டாடும் வாய்ப்பு கிடைத்தது மகிழ்ச்சியளிப்பதாக தெரிவித்தார்.

நமது நாடு அதன் எல்லைப்பகுதியில் எவ்வித சமரசமும் செய்ய தயாராக இல்லை என கூறிய அவர், நாட்டை பாதுகாக்க உறுதியுடன் செயல்படும் ராணுவ வீரர்கள் மீது அதீத நம்பிக்கை உள்ளதாக கூறினார்.

மேலும், எதிரிகளின் வார்த்தைகள் மீது ஒருபோதும் நம்பிக்கை கொள்வதில்லை எனவும் உறுதிபட பிரதமர் தெரிவித்தார்.